1990 ರಲ್ಲಿ ಪ್ರಾರಂಭವಾದ ಈ ಸಂಘವನ್ನು ನಂತರದಲ್ಲಿ ಕಾರ್ಯದಕ್ಷತೆಗಾಗಿ ಹಲವು ಉಪವಲಯಗಳನ್ನಾಗಿ ವಿಂಗಡಿಸಲಾಯಿತು. ಸಂಘದ ಮೂಲ ಕಛೇರಿ ಮಂಗಳೂರಿನಲ್ಲಿದ್ದರೂ, ಸಾಕಷ್ಟು ಸ್ಥಾಪಕ ಸದಸ್ಯರು ಮಂಗಳೂರಿನವರೇ ಆಗಿದ್ದರು. ಹಲವು ವರುಷಗಳಿಂದ ಮಂಗಳೂರಿನ ಛಾಯಗ್ರಾಹಕರೇ ಹೆಚ್ಚಾಗಿ ಮಾತೃ ಸಂಘದ ಪದಾಧಿಕಾರಿಗಳ ಸ್ಥಾನದಲ್ಲಿ ದುಡಿದಿದ್ದರೂ, ಮಂಗಳೂರು ವಲಯ ಸ್ಥಾಪನೆಯಾಗಲು ಸರಿ ಸುಮಾರು 10 ವರುಷಗಳು ಕಾಯಬೇಕಾಯಿತು.
      ವೃತ್ತಿ ರಂಗದ ಪೈಪೋಟಿ ಹೆಚ್ಚಾದಂತೆ, ವೃತ್ತಿಯೇತರ ವ್ಯಕ್ತಿಗಳ ಉಪಟಳ ಜೋರಾದಂತೆ,ವಲಯ ಸ್ಥಾಪಿಸುವ ಅನಿವಾರ್ಯತೆ ಕಂಡು ಬಂದಾಗ ಮಂಗಳೂರು ನಗರದಿಂದ ಸುರತ್ಕಲ್, ಬಜ್ಪೆ, ಗಂಜಿಮಠ, ಕೊಣಾಜೆ, ತಲಪಾಡಿವರೆಗಿನ ವೃತ್ತವನ್ನು ಗುರುತಿಸಿ 'ಮಂಗಳೂರು ವಲಯ' ಸ್ಥಾಪಿಸಲು ತೀರ್ಮಾನಿಸಲಾಯಿತು. ಹರ್ಷಾಕರ್, ಸಿ.ಎ. ಸಾಲ್ಯಾನ್, ಮನೋಜ್, ದಯಾನಂದ್ ಪೈಯಾಡೇ, ಅನಿಲ್ ಬಿಜೈ, ದೇವಿಪ್ರಸಾದ್, ಕೆ. ಮನೋಹರ್ ಸೋನ್ಸ್, ಪ್ರವೀಣ್, ರಮೇಶ್, ಅರುಣ್ ತೊಕ್ಕೊಟ್ಟು, ಸಂತೋಷ್ ಮಾರ್ಲ ಹಾಗೂ ಇನ್ನೂ ಕೆಲವು ಸದಸ್ಯರು ವಲಯ ಸ್ಥಾಪಿಸಲು ಮುತುವರ್ಜಿ ವಹಿಸಿರುವುದನ್ನು ಈ ಸಂದರ್ಭದಲ್ಲಿ ಸ್ಮರಿಸಬೇಕಾಗುತ್ತದೆ.
      2001 ರ ಸಪ್ಟೆಂಬರ್ 30 ರಂದು ಲಯನ್ಸ್ ಕ್ಲಬ್ ಮಲ್ಲಿಕಟ್ಟೆ ಇಲ್ಲಿ ಸಿ.ಎ. ಸಾಲ್ಯಾನ್ ಇವರ ಘನ ಅಧ್ಯಕ್ಷತೆಯಲ್ಲಿ ಮೊದಲ ವಲಯ ಮಹಾಸಭೆಯನ್ನು ನಡೆಸಲಾಯಿತು. ಸುಮಾರು 500 ಕ್ಕಿಂತಲೂ ಹೆಚ್ಚು ಸದಸ್ಯರನ್ನೊಳಗೊಂಡ ಮಂಗಳೂರು ವಲಯ ಮನೋಹರ್ ಸೋನ್ಸ್, ರಮೇಶ್ ಕಲಾಶ್ರೀ, ಜಗನ್ನಾಥ್ ಶೆಟ್ಟಿ, ಗಣೇಶ್ ಶೆಣೈ, ಚಂದ್ರಕಾಂತ್ ಇವರ ಅಧ್ಯಕ್ಷತೆಯಲ್ಲಿ ಮುಂದುವರಿಸಿಕೊಂಡು ಬಂದಿತು. ಇದೀಗ 2015-2017 ನೇ ಸಾಲಿಗೆ ಲೋಕೇಶ್ ಅವರು ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಮಂಗಳೂರು ವಲಯದ ಸ್ಥಳ ವ್ಯಾಪ್ತಿಯು ದೊಡ್ಡದಾಗಿದ್ದುದರಿಂದ ಹಾಗೂ ಸದಸ್ಯರ ಸಂಖ್ಯೆಯು ಹೆಚ್ಚಾಗಿದ್ದುದರಿಂದ 2008 ಮತ್ತು 2010 ರಂದು ಸುರತ್ಕಲ್ ಮತ್ತು ಉಳ್ಳಾಲ ಪ್ರದೇಶವನ್ನು ಮಂಗಳೂರು ವಲಯದಿಂದ ಬೇರ್ಪಡಿಸಿ ಮಂಗಳೂರಿನ ಕಾರ್ಯವ್ಯಾಪ್ತಿಯನ್ನು ಕಿರಿದುಗೊಳಿಸಲಾಯಿತು. 2001 ರಿಂದ ವಲಯ ನಡೆದು ಬಂದ ಹಾದಿ ಹಾಗೂ ಕಾರ್ಯಚಟುವಟಿಕೆಗಳನ್ನೊಮ್ಮೆ ಅವಲೋಕಿಸೋಣ.